Zan mʋr Yezu ɔkɔ, Satan kɔrsɩ Yezu
Zan xɛ gʋsɛɛrsɛ nʋ Nyelye sʋn Ɩsrayɛlbɔrɩ
Matiye 3.1-2
1-2 Xɔ yi xɔ dan mɔ Zanbatɩs ɩsɩ Yudakpatɩbɔrɩ, anʋ sɛɛrnʋ nyʋbɔ Nyelye a gʋn, a kollebo a la:
mɔ Nyelye a wʋsɛkɛ tʋra-ɩrɩ, ɩ-dɛ baanɩkɛ.
Zan tʋʋnɩkɛ nyʋbɔ a la bɔ bɛnnɩ bɔ dɛ baanɩkɛ. Xɔɔ bakɔ Zan ɩnʋ kor kollebo bɔ gbankɛ bɔɔ gbɔɔyapɔ lɛ bɔ miye Nyelye a gʋʋnrɩ, lɛ gbankɛyɛ bɔɔ ta pɛpɛɛnbɔrɩ, lɛ gbankɛ dʋkɔtɩ killi a gʋnrɩ. A kollebo a la bɔ gbankɛ bɔɔ gbɔɔyabɔ lɛ xɔɔlɔmʋ bɔ tʋwamnɩ lɛnʋ bɛr Suwse nu Nyelye sa xɔa nʋfɩyaa lɛ habɔ.
Nyelye tanɩ lɔ xɛ kparyay Nyelxo nu bɔ bɛnnɩ bɔ fɔɔr lɛ pʋnkɛyɛ bɔɔ miyenu.
Xɔ bɛnnɩ dʋkɔtɩ bɔ dɛ mɔ bɔ xɛ killi Nyelyeri mɔ bɔ kay xɔa ‘pɔrɛbɔ a dʋkɔɔ, dʋkɔtɩ lɛ giloza bɔnaa laa maa xɛ kɛkɛ lɛ dʋʋnnʋ Nyelye wa.
Xɔ bɛnnɩ bɔ kan dʋkɔtɩ mɔ killi killi fɛw xɛ ŋmɔpɩyɛ Nyelyeri, dʋkɔtɩ lɛ mɔ Nyelye nyaasɩ killi, dʋkɔtɩ lɛ mɔ xɔy paankɛ killise killise fɛw vannɩkɛnʋ lɛ a ya datusiyeri.
Xɔɔ gʋtanɔɔ lɔ Nyelye kor ɛɛ kan dʋkɔtɩ mɔ ɩ tantan fɛw ɩ gʋnrɩ. Nyelye kor ɩ dɛ xɔxɔ.
Zan xɛ lɔɔ nʋ Ezayi nʋ xɛ Nyelye a gʋsɛɛrsɛ kpeny a la a yi kpeny Suwse nu Nyelye la xɔnaay habɔ lɛ yi.
Matiye 3.3
3 Ezayi nʋ xɛ Nyelye a gʋsɛɛrsɛ duu a kpeny a sɛɛr Zanbatɩs a gʋʋn a la: wɛ nyʋny par kpatɩbɔrɩ lɛ la: ɩ-tɛnnɩ Tɔsɛ a bʋlaxɔ lɛ xɔ-kɛrɛ, ɩ-tɛnnɩkɛ kɛyakarɩ lɛ xɔ nanpɩ.
Zan xɛ nyʋn nʋ xɛ zakasɛ
Zan ɩsɩ a xɛ Nyelye a gʋsɛɛrsɛ, lɛɛ xɔxɔ a xɛ mɔ Zan ɩsɩ a xɛ kpose yi. Zan ɩsɩ a xɛ zakasɛ kɛyakarɩ. Lɔxɔ nʋ a dan kpatɩbɔrɩ xɔɔ lɔ a xɛ dɩ. Ba gandɔ nʋ a xɛ yeke karanpɩ mɔ a zakarɩ deny.
Matiye 3.4
4 A Zan a gandakɔ nʋ a yeke xɔɔ sɩxɔrɩ, bɔ zɛɛlɛkɛnʋ nyɔɔmɛ fumo. A tɩɩ nantɔfereke a kabnʋ ba kpɩna. Ba dɩɩlɔ xɛ toosu lɛ waa.
Wɛ nyʋbɔ gbɔɔza bɔnaa dʋʋ bʋlaxɔ nʋ Nyelye a Sɛɛra karanpɩbɔnaa, nʋ xɛ lɔxɔ nʋ nyʋbuxɩnaa karanpɩbɔnaa, bɔnaay xɛ Nyelfɔɔrsɛbɔ lɛ woo gɩxɛlɛmʋ ‘pony mʋ nyʋbuxɩnaa.
Nyelye a sa xɔa nʋfɩyaa xɔ la lɛɛ bɩɩ xaanhɩnaanrɩ, bɩ kanɔ xɔa Sɛɛra a tennike bɩy xɛ kposebo yi. Nyelye a gʋsɛɛrsɛ gbalawapɔ pananga lɛ lɔbɔ nʋ xaanyɛrɩ xɛ zakasɛbɔ kɛyakarɩ. Xɔa koorikeri ɩy nɩ mɔ Yezu nu xɛ Nyelye a bii dɩkɛ ɩsɩ zakarɩ sɩnxɔ nʋ a ɩsɩ baakʋ burkori.
Nyʋpoko xaanrɩ Nyelye a Sɛɛra nʋ Zan sɛɛrbɔ
Matiye 3.5,6
5 A nyʋbɔ gu Yɛrʋzalɛm lɛ Yudahɩnyɛ lɛ Zʋrdɛnkalɔrɩ bɔ yaahʋnrɩ, 6 bɔ xar bo killibo anʋ mʋrbɔ ɔkɔ Zʋrdɛngboreko a mixo.
Yifibo pananga xaanrɩ Nyelye a Sɛɛra nʋ Zan karanpɩbɔ. Zan kollebo a la: bɔɔ dɛ lɔxɔ nʋ Nyelye sɛɛr, lɛ dɛ mɔ bɔ xɛ killisebo, lɛ xɔɔxɛ bɔ bɛrɔ Suwse nu Nyelye bɛnnɩ xɔ sʋnnʋ, bɔ bɛnnɩ bɔ woo ɔmʋrwɔ Zannʋ. Mɔ bɔ mʋrɔbɔ ɔkɔ karanpʋ mɔ bɔ sa tanɩ Nyelyenu lɛ dɛ mɔ bɔnaa bɛnnɩ bɔnaa pɩɩ bɔnaa killibo lo xɔ tɩɩti, lɛɛ bɔnaa bɛrɔ Suwse nu Nyelye sʋnmɔ nʋ lɛ a yi suwbonaa.
Ɔmʋrwɔ a maa gbankɛbɩ lɛ bɩ dʋʋnnʋ Nyelye yi. Ɔmʋrwɔ nʋ xɛ osugɩyɛ, xɔa nʋnʋ maa lɛ paalɛ bɩ killibo Nyelye a hɩmanga yi. Lɛ woo ɔmʋrwɔ, xɔa maa fɔɔr pɛnxɔ Nyelye a hɩmanga yi. Killi a pɛnfɔɔrɛkɛ xɛ pɩɩrɛkɛ. Ɔmʋrwɔ xɛ gɩxɔ nʋ karanpʋ wɛɛbɔ mɔ wʋ dɛ lɔxɔ nʋ Nyelye a Sɛɛra ka, lɛɛ gɩyɛ tanɩ tenten lo wʋ bɛrɔ, xɔɔ gɩxɔ xɛ mɔ Nyelye suwowu.
Sɛɛrabɔ nʋ Zan xɛ sɛɛrnʋ hɩtɔpʋnkɛsɛbɔ
Matiye 3.7
7 Wɛ gɩraarɩ mɔ anʋ mʋrbɔ ɔkɔ a lal a nɩ Farɩzɛn nyʋpoko lɛ Sadʋsɛn nyʋpoko, bɔnʋ yi lɛɛ a mʋrbɔnaa ɔkɔ. Aa bibbo a la: ɛɛ nʋ xɛ kpankpokpalwɔɔ, ankɔ lɔ za ɩ maa sey Nyelye a hʋnxɔ nʋ yow?
Yifibo fɩllɩwapɔ pananga ɩsɩ bɔ xɛ hɩtɔpʋnkɛsɛbɔ. Bɔa maa dɛ mɔ bɔ xɛ killisebo yi. Bɔ xɛ gbɔɔza bɔnaa kɛrɛ mʋ, Nyelye maa dɛ bɔnaa gʋn. A mɔ Farɩzɛnbɔ lɛ Sadʋsɛnbɔ ɩsɩ bɔ xɛ pʋnkɛ bɔɔ hɩtɔ gbʋna, Zan sɛɛrbɔ sɛɛrabɔ nʋ kanbɛy.
Nyelye xɛ sɛɛr kanbɛywaka nʋ hɩtɔpʋnkɛsɛbɔnʋ, lɛ lɔbɔ nʋ xɛnʋ nʋʋlɛkɛnʋ lɛ bɔ kay xɔa Sɛɛra a tennike a kanga. Kwaan lɔ Nyelye xɛnʋ wʋlanʋ hɩtɔpʋnkɛsɛbɔ nʋ xɛ kay mɔ bɔ sawwɛnʋ tanɩ. Lɛɛ xɔ lɔ tʋwamnɩ xɔ bɛrɔ lɛ dankɛrɩ lɔbɔ nʋ dɛ bɔ giloza bɔnaa xɛ killisebo, dʋkɔtɩ bɔ giloza Nyelxo xɔaba xɔɔ lɔ maa danbɔnaanrɩ, xɔ tʋwamnɩ lɛ suw xɔɔ bɔbɔɔ.
Matiye 3.8
8 Ɛɛ yi lɛ dɛ baanɩkɛ gʋnnʋ, xɔ bɛnnɩ ɩ-gbankɛ ɩ xɛbiibo.
Zan kolle Farɩzɛnbɔ lɛ Sadʋsɛnbɔ a la: xɔɔxɛ bɔ dɛ lɔxɔ nʋ Nyelye sɛɛr Zan a nʋfɩyaanʋ bɔɔ gʋʋnrɩ, xɔ bɛnnɩ bɔ karanpɩkɛ bɔɔ xɛɛwakanʋ.
Matiye 3.9
9 Ɩa xɛ gbɔɔ lɛ la: mɔ ɩ xɛ Abraham a hoopo dimibo ɩy bal Nyelye a hʋnxɔ wa. Mɩ karanpʋ-ɩ Nyelye, xoo kor xɔ maa tɩɩ xoo neero lɛ gbankɛyɔ lɛ hɩn xɛ Abraham a hoopo dimibo.
Yifibo pananga ɩsɩ xɔ dʋʋnbɔnʋ mɔ Abraham lɔ xɛ bɔɔ pʋlakɔ ta sʋwa. Bɔ xɛ gbɔɔza Nyelyey dɛ bɔɔ gʋʋn mɔ bɔ xɛ Abraham a woopo dimibo lo xɔ tɩɩti.
Wɛ nyʋbɔ ti daa bɔ gbɔɔza Nyelyey dɛ bɔɔ gʋʋn xɔɔ dereenu mɔ bɔɔ kunsebo marrɩ Nyelye bɔ xaanyɛrɩ lɔ xɔ tɩɩti. Nyelye a xɛ dɛ nyʋn a gʋʋn ba kunsebo lo xɔ tɩɩti yi. Nyelye xɛ si nyʋbɔ kparyay bɔɔ baba. Zan kollebo a la bɔa xɛ zɛy xɔ dʋʋnbɔnʋ, xɔ kay bɔa xɛ xaanrɩ mɔ bɔ xɛ Abraham a bɩpɔ wa. Nyelye xɛ xɛ lɔxɔ nʋ xɔ kor fɛw. Xɔ maa tɛnnɩ Abraham a bɩpɔ neeronu, xɔɔxɛ xɔ kor.
Matiye 3.10
10 Zan vɩr a karanpɩbɔ wɛ sʋrɩya a la: kpetixo fa lɛ futi dɩwɔ nʋ a xɛ nyeb nyebkɛyɔ wa lɛ pow daa.
Xɔɔxɛ ɩ nɩ dɩwŋmɔpɩyɛ fu ɩ sɔnbɔ dɩwɔ a sundɛkɛ, bɛkɛlɔ ɩy xɛ? Ɩ maa gbankɛ dɩwŋmɔpɩyɛ dɩwkɛyaka sɩnxɔ nʋ ɩ kpeti xɔa wɛ ‘lepu ya? Kpey!
Mɔ ɩ kpɩllʋ dɩwŋmɔpɩxɔ a nyebwo lɛ poosi, xɔxɔ maa xɛ lɛ dɩwŋmɔpɩxɔ gbankɛ dɩwkɛyaka ya? Kpey, dɩyaa xɛ xɔa kɛrɛ wa, lɔxɔ nʋ ɩ maa xɛyɛrɩ xɛ mɔ ɩ kperowe nabiiyeri lɛ nyoke.
Bɩ fɛw bɩ tɩɩnɩ dɩwŋmɔpɩyɛ. Bɩ xɛ Adam nʋ kay Nyelye a tennike a kanga ba bɩpɔ. Gʋŋmɔpʋ nʋ bɩ xɛnʋ gbɔɔ lɛ lɔbɔ nʋ bɩ xɛnʋ sɛɛr lɛ lɔbɔ nʋ bɩ xɛnʋ xɛ pɛpɛ tɩɩnɩ dɩwŋmɔpɩyɛ a nyebwo nu bɔa nyʋw wa. Mɔ xɔa tɩɩw dɩwŋmɔpɩxɔ a nyebwo nu wʋ kpɩllɩ wʋ poosi lɛ xɔ gbankɛ dɩw kɛyaka wa, mɔɔ lɔ bɩa nʋnʋ maa lɛ gbankɛ bɩ hɩtɔ lɛ dʋʋnnʋ Nyelye bɩ gʋŋmɔpʋ nʋ bɩ xɛ gbɔɔ, xɔ kay lɔbɔ nʋ bɩ xɛ sɛɛr, xɔ kay lɔbɔ nʋ bɩ xɛ xɛ, xɔ xɛmʋza hɛɛn lɔ bɩ poosi lo xɔ tɩɩti yi. Halɛ xɔɔxɛ mɔɔ lɔ bɩ xɛ yoo, bɩ kayɔ ɩsɩfa lɛ xɛ dɩwŋmɔpʋ Nyelye a hɩmanga.
Lɔbɔ fɛw nʋ kay mɔ bɔ saw tanɩ Nyelyenu, lɛɛnʋ bɛryɛ xɔaba lɛ xɔ yi suwbo, xɔɔ bɔbɔɔ fɛw tɩɩnɩ dɩwŋmɔpʋ nʋ Nyelye yi kpeti poosi. Bɔ yi pɩtɩ lɛ xɔ poobo datusixo a mixo, xɔxɔ lɔ xɛ bɔɔ paankɛxɔ.
Lɔxɔ nʋ Zan sɛɛr Suwsee ba gʋnrɩ
Matiye 3.11
11 A vɩr a kollebo a la: halɛ mɩɩ, mɩ fa mɩ mʋrɔ-ɩ ɔkɔ lɛ karanpɩ mɔɔnʋ nyʋbɔ dɛ baanɩkɛ, lɛɛ, lɔɔ nʋ fi a yow hʋn lɔ gbal a ‘lɩnkɛmɩ, maa dan gɩyɛ lɛ pole ba natɩtɔw wa. Sɩnxɔ nʋ ay yi ay mʋr-ɩ Nyelye a Tonrenu lɛ daa.
Zan xɛ Nyelye a gʋsɛɛrsɛ nʋ xɔ sʋn lɛ a yi tʋwamnɩ nyʋbɔ lɛ bɔ bɛr Suwsee lɛ xaanhʋnrɩ. Zan xɛ nyʋn, lɛɛ Suwse nu bɛnnɩ a yi xɛ Nyelye a Bii.
Zan a sɩnyɛrɩ nyʋgbalawapɔ ɩsɩnʋ nyʋbɔ nʋ xɛnʋ xɛ bɔɔ boo fɛw bɔɔ wʋrɔrɩ. Nyʋgballa a xɛ yeke ba natɩtɔw bati, xɔ kay lɛ siinleko bati yi. Xɔɔ booxo, boosebo lo xɛ xɛyɛ. A xɔn fa Zan la hɩnaa laa dan nyʋn nʋ bɛnnɩ a siinle Suwsee ba natɩtɔw yi. Suwsee xɛ Nyelye a Bixɩna. Hʋʋn lɔ xɛ hɩnxɔ a sankɛsɛ, lɔɔ nʋ ha Zan tagoon.
Lɔbɔ nʋ sa tanɩ Nyelyenu fɛw, bɔ xaan mɔ Nyelyey sʋnnʋ Suwse lɛ habɔnaa, Zan ɩnʋ mʋrbɔ ɔkɔ, lɛɛ Suwsee bɛnnɩ a xɛ lɔxɔ nʋ gbal a ‘lɩnkɛ ɔkɔ nʋ Zan ɩnʋ mʋr xaansɛbɔɔ. Lɔbɔ nʋ xaanhʋnrɩ fɛw mʋ Suwsee, a bɛnnɩ a habɔ Tonreduwa.
Matiye 3.12
12 Xɔ tɩɩnɩ mʋ ay yinu ba sɛrɛgɩyɛ, ay sɛrɛ haybiw fɛw. Lɔbɔ nʋ kɛrɛ ay sayɔ gboroo, lɔbɔ nʋ ŋmɔpɩ ay poko daatusixo nʋ fa kpokpo hubekay.
Sɩnxɔ nʋ ɩ par maru ɩ law, ɩ xɛnʋ hawɛɛ lɛ geke yaanʋ hayaxɔ lɛ tɔgɔwwɔɔ, nʋ xɛ hayaa. Hayaxɔ a kɛrɛ yi. Xɔa maa xoo yi. Hayaxɔ xɔy pʋ, ɩ xɛ taalɛkɛyɛ lɛɛ nyoke.
Zan la: lɔbɔ nʋ kay Nyelye a Sɛɛra nʋ Suwsee yinu ba tennike a kanga, bɔ laa dɛ bɔ sa tanɩ Nyelyenu wa, bɔ tɩɩnɩ hayaxɔ. Suwseey sabɔ kpee lɛ lɔbɔ nʋ xaanrɩ ba Sɛɛraa, bɔ vɩr bɔ xaanhʋnrɩ. Suwseey poo lɔbɔ nʋ tɩɩnɩ hayaxɔ datusiye a miye, lɛ paankɛbɔ.
Zan mʋr Yezu ɔkɔ
Matiye 3.13-16
13 A Yezu gu Galileehɩnyɛ anʋ yiri Zan Zʋrdɛngborekori lɛ a-mʋrhɩnaa ɔkɔ. 14 A mɔɔnʋ Yezu yi, Zan ɩnʋ kay a la: gaa lɔ yi lɛ mɩ-mʋrwʋ ɔkɔ ya? Mɩɩ lɔ bɛnnɩ wʋ-mʋrmɩ ɔkɔ. 15 A Yezu kollee a la: dɛ, lɛ bɩ xɛ lɔxɔ nʋ Nyelye ka fɛw. A Zan dɛ a xɛyɛ. 16 Mɔɔnʋ a mʋrɛɛ a law bakɔ bakɔ Yezu san ɔkɔɔ. A nyeltaxɔrɩ kpal. Yezu lal a nɩ fi Nyelye a Tonre, a tɩɩnɩ lɛɛwa. A gu fi a yi a woreeri.
Yezu a yaarɩ Zan lɛ a mʋrɛɛ ɔkɔ mɔ a xɛ killise lo xɔ tɩɩti yi, xɔ kay Suwse lo a nyʋw mʋ lɔbɔ nʋ ɩnʋ yaarɩ Zan lɛ a mʋrbɔ ɔkɔ yi. Bɔ kun Yezu zɛynabalɛ. A ɩsɩ a taalɛkɛnʋ Nyelye zɛynabalɛ. A nanpɩ a du.
Yezu zɛy Zan mʋrɛɛ ɔkɔ mɔ xɔ xɛmʋza xɔɔ bʋlaxɔ lɔ Nyelye lal Yifibo fɛw nʋ xɛ tɩɩ Zan mʋ Nyelye a gʋsɛɛrsɛɛ. Yifibo fɛw nʋ giloza Zan xɛ Nyelye a gʋsɛɛrsɛ gʋnnʋ, bɔ bɛnnɩ bɔ zɛy Zan mʋrbɔ ɔkɔ. Yezu hʋʋn xɛ aa zɛy Zan mʋrɛɛ ɔkɔ wa, nyʋbɔy gbɔɔza aa dʋwɔ Nyelye a ‘pɔrɛbɔ wa, xɔ kay Zan a xɛ Nyelye a sʋnsɛ wa.
Tonreduwa yiri Yezu lɛ haan maa lɛ a xɛnʋ lɔxɔ nʋ Sʋwa Nyelye kpeny xɔ pɩr xɔ tɛnnɩ xɔ sasɩ duu ba gʋʋnrɩ. Yezu xɛ Nyelxo nu tɔ pananga dʋkɔtɩ, lɛɛ sɩnxɔ nʋ a gbankɛ nyʋn a pɩr mɔ Tonreduwa nʋ xɛ Nyelye lo a doroti lɛ xɔ haan maa lɛ a xɛnʋ booxo nu xɛ Suwsee a boo baakʋ burkori.
Lɔxɔ nʋ Nyelye sɛɛr Yezu a gʋnrɩ
Matiye 3:17
17 A bɔ kan sɛɛra nʋ gu nyeltaxɔrɩ a la: lɔɔ nʋ lɔ xɛ mi bixɩnaa nʋ mi kor deny, Ba gʋʋn dʋʋnmɩnʋ kɛyakarɩ.
Sʋwa Nyelye xɛ bʋllɛ Yezu baan Bii. Yezu ɩsɩ a xɛ nyʋn lɛɛ a xɛ Bii nu xɛ Nyelye dʋkɔtɩ nʋ gu nyeltaarɩ a wɛr burkori.
Xɔ ɩsɩ xɔ dʋʋnnʋ Nyelye kɛyakarɩ Yezu a gʋʋnrɩ. Hʋʋn tanɩ tenten hʋʋn lɔ xɛ lɔxɔ nʋ dʋʋnnʋ Nyelye. Yezu a xɛsɩ killi tanɩ Nyelye a hɩmanga yi.
Yezu xɛ Nyelye a annabii
Zan 1.29
29 Xɔa seekutu Zan nɩ Yezu ɩnʋ yiinri, a la: ɩ dow Nyelye a annabii nʋy fow killi nʋ hɩɩnxɔ.
Mɔ Zan nɩ Yezu, a par a la: Yezu xɛ annabii nu Nyelye lal, lɔɔ nʋ Nyelye sʋnnʋ.
Ɩ tʋndɛkɛnʋ ka? Abɛl ha anna ba ɩsɩna, a Nyelye dɛ ba gʋʋn.
Sɩnxɔ nʋ Abraham nʋ xɛ Nyelye a tennikansɛ ɩnʋ kor kʋ Ɩzakɩ, Nyelye inkee. A mɔ Abraham ɔrkɛ ba taa, bɛkɛlɔ a nɩ haybuunxo a mixo a xɔa unu tuulen? Aan, annasaan. Lɛɛ ankɔ lɔ sa fa xɔɔ annasaanhʋn lɛ a lalɛɛ Ɩzakɩ a ɩsɩna? Nyelye lo. Nyelye lo lal xɔɔ annasaanhʋn lɛ a sʋlayɛɛ lɛ xɔɔlɔmʋ Ɩzakɩ woo suko pɩɩrɛkɛrɩ.
Mɔ pɩɩrɛkɛ a bɛrsɛ bɛnnɩ a yee Ezipihɩnyɛ, Nyelye kolle Israyɛlbɔ xɔ la mɔ bɔ wʋratɔsɛbɔɔ, bɔ kʋtɩ annabiibo lɛɛ tɩɩ hɩn tɔbɔbɔ lɛ ‘pʋl bɔɔ nʋnɔrɩ. Annabiihun tɩɩ bisaanhʋn a ɩsɩna a pɩɩ.
Lɛɛ namɔ a tɔbɔbɔ a maa fɔɔr killi a pɛngɛ yi. Xɔxɔ lɔ xɔ tɩɩti Nyelye lo sʋnnʋ Yezu hɩnxɔ lɛ a yi fɔɔr killi a pɛnxɔ fɛw lɛɛ suw lɔbɔ fɛw nʋ saanrɩ bɔɔ xaan. A mɔ Nyelye ha annasaan Ɩzakɩ a ɩsɩna, mɔɔhʋnlɔ Nyelye lal xɔa Bii lɛ a tɩɩ lɔbɔ nʋ xaanhʋnrɩ fɛw bɔɔ ɩsɩna.
Zan giloza Yezu lo xɛ Suwse nu Nyelye sati xɔa nʋfɩyaa
Zan 1.30-34
30 Zan la: ba gʋʋn lɔ mɩ kpeny mɩ sɛɛr mɩ la: wɛ nyʋʋn fi a yow, lɛɛ a lɔ ɩsɩ a kpenymi a fa. 31 Mɩɩ, mɩa kpeny mɩ giin wa, lɛɛ mɩ yi lɛy mʋr nyʋbɔ ɔkɔ lɛ karanpɩnʋ Ɩsrayɛlbɔ.
32 Ɩ dow Zan a sɛɛra nʋ a vɩr a sɛɛr a la: mɩ nɩ Toonre-Duuwa a gu ‘lekeri a wɛr a woorri Yezu mʋ lɛɛwaa. 33 A mɩɩ, mɩa giinsi wa, lɛɛ Nyelxo nʋ sʋnmɩ mɩy mʋr nyʋbɔ ɔkɔ, xɔɔlɔ kollemi xɔ la: lɔɔ nʋ wʋ yi wʋ nɩ Toonre-Duuwa wɛr a woorri, hʋʋnlɔy mʋr Toonre-Duuwanʋ. 34 A mɩ yi mɩ nɩɩ, xɔlɔxɛ mɩ sɛɛrɔwɛ mɔ a xɛ Nyelye a Bixɩna.
Zan a kpeny a gi lɔɔ nʋ bɛnnɩ a xɛ Suwsee yi, lɛɛ mɔ a nɩ gɩbeetikewakɔ nʋ Nyelye lal, xɔɔ bakɔ a kan a giloza Yezu lo xɛ Nyelye a Bii, hʋʋn lɔ xɛ hɩnxɔ a Suwse.
Bɩ nyʋw gɩbeetikewo mʋ lɔxɔ nʋ Nyelye ha Zan lɛ hɩn karanpɩbɩ mɔ Yezu lo xɛ Nyelye a Bii, lɛ Suwse nu xɔ sati xɔa nʋfɩyaxɔ ya? Kpey, bɩa nyʋw gɩbeetikewo nʋ xɛ gʋgballɔ yi, xɔgumɔ bɩ nʋnʋ Nyelye a Sɛbɛ nʋ xɛ Nyelye a Sɛɛra. Nyelye kor ɩ xaanrɩ xɔa Sɛɛra nʋ sɛbɛ sɛbɛ nʋʋ a miye. Bɩɩ kay Nyelye a Sɛɛra a xaanrɩ, bɩay maa dʋʋnyɛnʋ kpee yi.
Satan kɔrsʋ Yezu
Matiye 4.1
1 Mɔɔnʋ bɔ mʋr Yezu ɔkɔ bɔ law Nyelye a Tonre tɩɩhʋn lɛ saan lɛ yaanʋ kpatɩbɔrɩ. A Satan yaa fi tɩ laa kɔrsɩ Yezu.
Satan a gbankɛ yi. A ŋmɔpɩ dɩkɛ gownaarɩ. Satan waarɔ bʋlaa lɛ xɛ Yezu lɛ a wʋlanʋ Nyelye, gaa gi mɔɔnʋ a kɔrsɩ Adam. Satan ɩnʋ kor hɩnaa yeke Yezu hɩnaa dɔɔyakarɩ, lɛ xɔɔlɔmʋ Yezu a maa xɛ bɩ Suwse tɩ dan yi.
Tokpeny kɔrsɩkɔ
Matiye 4.2
2 Mɔɔnʋ Yezu gende ba nʋfɩya gɩrɔ townyor lɛ xɔa dʋmɔ aa dɩ gɩyɛ wa kʋmanga damɛɛ.
Yezu xɛ Nyelye, lɛɛ a ɩsɩ a xɛ nyʋn dɩkɛ kɛyakarɩ. Kʋmaan damɛɛn mɔ xɔ xɛ danbɩ.
Matiye 4.3
3 A Kɔrsɩsɛ yiinri, a kollee, a la: gaa xɛ Nyelye a bii deny, tɩɩ neeroo nu lɛ gbankɛyɔ paanʋ lɛ xoo.
Satan nʋ xɛ fʋlakɛsɛ lɛ kɔrsɩsɛ ɩnʋ waar bʋlaa lɛ xɛ Yezu lɛ a karanpɩhɩnaa mɔ a xɛ Nyelye a Bii. Satan fɩɩn Yezu a xɛ lɔxɔ nʋ Sʋwa Nyelye a kollee a xɛ yi. Yezu gu nyeltaarɩ a wɛr lɛ xɛ lɔxɔ nʋ bɔɔ Sʋwa kor kput. Yezu xɛ Nyelye a Bii. A ɩsɩnʋ maa lɛ gbankɛ neeroo paanʋʋ, lɛɛ Yezu a dɛ lɛ kan Satan a tennike yi. Lɔbɔ nʋ Satan la a xɛ fɛw, Yezu kay hɩn a xɛɛ.
Matiye 4.4
4 A Yezu kay a kollee, a la: Nyelye a sɛbɛ kollebi, a la: xɔa xɛ paanʋ lɔ nyʋn maa gbɛnʋ baba kput wa. A maa gbɛnʋ Nyelye a Sɛɛra nʋ xɛ ha nyʋn tagoon tɩ.
Bɩ nyʋw dɩɩlɔ lɛɛ maa ɩsɩfa goon, lɛɛ Nyelye kollebi xɔ la wɛ gɩyɛ ti xɔ kanbɛy xɔ kasa. Bɩ nyʋw Nyelye a Sɛɛra lɛ a karanpɩbɩ kparyay lɛ tagotusixo a bʋlaa.
Xɔɔxɛ bɩ fa tɔgbɔrkanbɛywakanʋ, bɩ yi bɩ pɩtɩ Nyelbalɛ, bɩ woo nyäänitusixo, bɛ bɩ ɩsɩnʋ ti tɔgbɔrkanywakɔ mɔɔ? Gʋnnʋ lɔ, bɩ nyʋw dɩɩlɔ lɛ maa ɩsɩnʋ tɔgbɔrkanbɛywaka, lɛɛ dʋkɔtɩ bɩ nyʋw lɛ kan Nyelye a Sɛɛra, lɛ xaanrɩ xɔɔ Sɛɛraa. Xɔɔlɔmʋ bɩy ɩsɩfa goon kpokpo Nyelyenu.
Nyorke kɔrsɩkɔ
Matiye 4.5-6
5-6 A Satan vɩr, a tɩɩhʋn, a yaanʋ Yɛrʋzalɛm. A tɩɩhʋn a ɩlanʋ Nyelfɔɔrwʋrgbalakɔ a tɩtɛɛrɩ. A kollee a la: Nyelye a sɛbɛ kollebi a la: Nyelyey sʋnnʋ xɔa nyʋbɛrsɛbɔ lɛ hɩn-bɛrwʋnʋ nunwo lɛ wʋay wor narsɩ la naa neerekeri wa. Satan vɩr a la: gaa xɛ Nyelye a bii deny, fer wor burkoo lɛ bi-dow Nyelyey dankɛwʋrɩ ya?
Satan gi sɛɛrabɔ nʋ Nyelye a Sɛɛra a mixo fɛw, lɛɛ aa xɛ tɩɩyɔ mɔ hɩn bɛnnɩ hɩn tɩɩ yi. A xɛ vɩrankɛ Nyelye a Sɛɛraa lɛ maa fʋlakɛnʋ nyʋbɔ. Ɩ tʋndɛnʋ mɔ a fʋlakɛ Ɛva ya? Satan bibee a la : gʋnnʋ lɔ Nyelye kolle-i, xɔ la: ɩa-xɛ munde dɩwnyebwo nu fa bäänii fɛw wa ya?
Satan kpeny a gi lɔxɔ nʋ Nyelye kolle Adam deny, lɛɛ a gbankɛyɛ gbɛrɩ. Satan xɛ bɩnnɩsɛ lɛ fʋlakɛsɛ.
Satan kolle Yezu a la a gu Nyelfɔɔryɔxɔ a taarɩ lɛ fer lɛ wɛr lɛɛ dow xɔɔxɛ Nyelye yi tɩɩhʋn mʋ xɔa Biihun lɛ bɛrɛɛ mɔ xɔ ka. Yezu a nyʋw lɛ kɔrsɩ bɔɔ Sʋwa lɛ dow xɔɔxɛ ay bɛrhɩnaa mɔ a ka yi.
Matiye 4.7
7 A Yezu kay a kollee tɩ, a la: Nyelye a sɛbɛ kollebi, a la: xɔa bɛnnɩ nyʋn kɔrsɩ Tɔsɛ nʋ xɛ ba Nyelye wa.
Sʋwa Nyelye sa ba nʋfɩyaa mɔ ay dow ba Biihun kɛyakarɩ, a xɔn fa Yezu xaanrɩ lɔxɔ nʋ bɔɔ Sʋwa sɛɛr kput.
Nyelye a Sɛɛra xɛ gɩxɔ nʋ bɛnnɩ nʋ xaan. Bɩa nyʋw lɛ kɔrsɩ lɛ dow xɔɔxɛ Nyelyey xɛ lɔxɔ nʋ xɔ ka wa. Bɩ bɛnnɩ bɩ xaanrɩ Tɔsɛ, xɔgumɔ lɔxɔ nʋ a sɛbɛ ba Sɛɛraarɩ fɛw a xɛ xɛyɛ.
Saanrkɛ kɔrsɩkɔ
Matiye 4.8-9
8 A Satan vɩr a tɩɩhʋn, a ɩlanʋ gbɔwgbalakarɩ. A yaa a karanpɩɩ hɩnw fɛw burkori lɛ hɩn a bɔngɔ. 9 A kollee a la: gaa xundesi mɩ hɩmanga wʋ fɔɔrɔmɩ, mɩy hawʋ xɔɔ hɩnwhʋn lɛ hɩn a bʋngɔ lɛ hɩn-xɛ lamʋn.
Satan maa zɛy Yezu ɩsɩnʋ pananga nyʋbɔrɩ, xɔgumɔ sɩnxɔ nʋ Adam kay Nyelye a lɔ dʋʋ Satan, Satanhʋn gbankɛ a xɛ lɔ hɩnxɔ a nyelye. Satan maa sinpi lɔ hɩnxɔ nʋ bɩ ti daa xɔa nyʋbɔ tonrebo sabaalɛ a ti yi, xɔ ya xɔ dannʋ dɩkɛ mɔ a maa za hɩn xɛ gʋŋmɔpʋ nʋ a tʋwamnɩ a sasɩ lɛ hɩn xɛyɔ.
Matiye 4.10
10 A Yezu kay a kollee, a la: Satan, ɔrɔ fa mɩ baka. Nyelye a sɛbɛ kollebi tɩ, a la: Tɔsɛ nʋ xɛ la Nyelye, xundesi ba hɩmanga lɛ fɔrɛɛ baba, lɛ vɩr kan ba tenike.
Satan waar bʋlaa lɛ xɛ Yezu lɛ a pʋnkɛhɩnaa. Xɔa gownaa, Satan kpeny a waar bʋlaa lɛ tɩɩ Nyelye a ɩsɩna lɛ xɛ hɩnxɔ fɛw xɔa wʋsɛ. Satan kpʋl, lɛɛ tonrepoko dʋwɛɛ. Xɔa koorikeri Satan nʋʋlɛ lɛ yeke nyʋbɔ ba dɔɔyakarɩ, a xɛbɔ a bɔ xɛ pʋnkɛɛ lɛ bɔ dʋwɛɛ. Satan giloza Yezu xɛ Nyelye a Bii. Xɔn fa Satan waarɔ bʋlaa lɛ tɩɩ Nyelye a ɩsɩna, xɔxɔ lɔ xɔ tɩɩti a la Yezu pʋnkɛhɩnaa.
Lɔbɔ fɛw nʋ Nyelye a suw Satan a nuwo wa ti bɔ pʋnkɔ Satan, lɛ bɔ xɛ ba boo bɔ lɔ kay Nyelye. Yezu maa Satan a kollee lɔxɔ nʋ mi Nyelye a Sɛɛrarɩ deny. Yezu a gbankɛ Nyelye a Sɛɛra mɔ Satan xɛ gbankɛɛ yi.
Yezu a kan Satan a tennike mɔ Adam kangɛ sɩnxɔ nʋ a ɩsɩ Edɛn daansʋkpɛɛxɔ a miye. Yezu gi bɔɔ Sʋwa, a koree, a vɩr a xɛ kan ba tennike.
A bɛɛ za bɩ do dɩkɛ, Yezu gbal a ‘lɩnkɛ Satan. Yezu hʋʋn ba pɛpɛɛn hʋn xɛ Nyelye. Hʋʋn lɔ sankɛ Satan xɔa gownaa. Xɔɔ sɩxɔrɩ bɔ xɛ bʋllɛ Satan Lusifɛɛr. Wɛ gɩraarɩ Yezuy dʋ Satan lɛ lɔbɔ nʋ dʋwɛɛ fɛw datusiye a miye, lɔxɔ nʋ Nyelye tɛnnɩ xɔ sawbɔ.
Satan zɛy Yezu lɛ xɔ xɛ wɛ sɩnyɛ gbɛrɩ
Matiye 4.11
11 A Satan ɔrɔ a yaa, a zɛy fa Yezu. Bakɔ bakɔ Nyelye a nyʋbɛrsɛbɔ yi, bɔnʋ dankɛrɩ Yezu.
Satan giloza hɩnaa kpʋl. Xɔxɔ lɔ xɔ tɩɩti aan zɛy Yezu lɛ xɔ xɛ wɛ sɩnyɛ gbɛrɩ. Lɛɛ Satan vɩr a yi naw ‘pony xɔa koorikeri, a xɛ gʋnbɔ fɛw nʋ a maa lɛ Yezu kay Nyelye a tennike a kanga.
Kɔrsɩkɔ nʋ nyʋbɔ xɛ honpinu, Satan tɩɩyɔ fɛw a kɔrsɩnʋ Yezu. Lɛɛ lɔbɔ nʋ Satan xɛ la Yezu xɛ fɛw, Yezu a xɛsɩ hɩn a tanɩ yi. Sɩnwrɩ fɛw Yezu xɛ xɛ lɔxɔ nʋ dʋʋnnʋ bɔɔ Sʋwa Nyelye.
Mɔ Satan dʋsɩ Yezu, Nyelye sʋnnʋ xɔa nyʋbɛrsɛbɔ lɛ bɔy nu dow Yezu.
