Nowe a gʋʋn
Nyʋbɔ ‘pany
Duu Naarɩ 6.1
A mɔɔnʋ nyʋbɔ ɩn fa burkori bɔ yi bɔ ‘pany bɔ pʋ.
Lɛ goke Adan a sankɛ sɩxɔrɩ lɛ yi damɔnʋ sɩnxɔ nʋ gʋʋn nʋʋ ‘pɩnnɩ, dɩw danyɛ lɛ bominyor towtɔ lɔ ‘pɩnnɩ. Xɔɔ sɩxɔrɩ Kayɛn lɔ kʋ Abɛl a law, xɔɔ woo dɩw dɩkɛ ‘pony. Xɔɔ sɩxɔrɩ nyʋbɔ ‘pany dɩkɛ kɛyakarɩ. Nyʋbɔ nʋ ɩsɩ burkoori ɩsɩ bɔ pʋ kɛyakarɩ.
Lɛɛ welleke lo ɩsɩ xɔ dʋʋnnʋ nyʋpananga xɔɔ sɩxɔrɩ. Yɛrgʋn lɛ yɛrtɔɔ ɩsɩ xɔ yekebo xɔa dɔɔyakarɩ. Lɛ waar lɛ gi mɔ bɔ xɛw lɛɛ dʋʋnnʋ Nyelye, xɔxɔ aa xɛ bɔɔ gʋʋn yi.
Nyelxo nʋ xɛ Tonreduwa nʋʋlɔ lɛ a saw nyʋbɔ
Nyelye nɩ xɔɔ nyʋbɔ killii. Xɔa kor killi, lɛɛ xɔ lɔ kor xɔɔ nyʋbɔɔ, xɔnʋ kor bɔ dɛ baanɩkɛ. Xɔnʋ kor bɔ gbankɛ bɔɔ gbɔɔbii, bɔ dɛ lɛ la: bɔnaa xɛ ŋmanysɛ, lɛ gbulenke lɛ xaanrɩ Nyelye. Nyelxo nʋ xɛ Tonreduwa ɩnʋ kollebo ŋmennikay bɔ dɛ baanɩkɛ lɛ gbulenkeri Nyelye, lɛɛ bɔa nʋ dɛ yi.
Duu Naarɩ 6.3
A Nyelye la: geko nʋ mɩ ha nyʋn a xɔ xɛ tagon, xɔa maa ɩsɩ ba miye kpokpokpo law kay danwa, mɔɔnʋ nyʋn a xɛ tusi wa, a xɛ gɩpɩrwaka. Xɔlɔxɛ naakʋ ba dɩw ay ‘lɩnkɛsɩ towtɔtanɩ yi.
Nyelye kollebo mɔ xɔa vɩrɔ sɛɛrbɔnʋ dan yi. Xɔ kollebo xɔ la: bɔɔ kay bɔ ti bɔ siri xɔa tennikeri, xɔy dʋbɔsɩ lɛ bɔnʋ dʋw Satan lɛ xɔ lɔy paankɛbɔ dʋkɔtɩ. Nyelye kollebo xɔ la: xɔnaay habɔ dɩw tootɔtanɩ. Dɩw tootɔtanɩ a sʋndɛkɛ bɔɔ xɛ bɔa dɛ baanɩkɛ bɔ gbulenkeri Nyelye wa, xɔnaay paankɛbɔ.
Nyelxo nʋ xɛ Tonreduwa sɛɛrɔbɩnʋ bɩ miw, xɔ xɛ dʋʋrɩ wɛ nyʋbɔ dʋkɔtɩ lɛ sɛɛrbɩnʋ. A mɔ hʋn lɔ Satanhʋn xɛ sɛɛrbɩnʋ dʋkɔtɩ bɩ miw, xɔ xɛ dan wɛ sɩyɛrɩ bɩ gbɔɔza wɛ kwaan lɔ worbiri. Tonreduwa xɛ sɛɛrbɩnʋ lɛ la: dʋw la Nyelye a bʋlaa, sa la xaan Nyelyeri. Satan lɛ ba tonreŋmɔpʋʋ hɛn sɛɛr lɛ la: an xɛ kannɩkɛ gʋʋn nʋ Nyelye sɛɛrɔ yi. An xɛ dʋsɩ ɩ fɩllɩwapɔ ta ‘pɔrɛ yi.
Lɛɛ ɛɛ kay mɔ ɩ kanɔ Nyelye a tennike lɛ xaanyɛrɩ, Nyelxo nʋ xɛ Tonreduwa nʋ ɩnʋ sɛɛr-ɩnʋ duu, xɔ maa dan wɛ sɩyɛrɩ ɩa kanɔ xɔa sɛɛra tɩ dan yi. Xɔa sɛɛra maa kay mɔ a barɔ ɩnʋsɩ lɛ la: ɩ sa ɩ xaan Nyelyeri. Ɛɛ kay mɔ ɩ sawwɛnʋ tanɩ lɛ xaanrɩ xɔa gʋʋn nʋ xɔ sɛɛr, xɔa sɛɛra maa hube mʋ dɩkɛ gbuli, lɛɛ zɛy ɩnʋ dʋw ɩ tɔlati bʋlaa. Bɔlɔ sɩnxɔ nʋ ɩy pɩɩ, ɩy yaa datusixori lɛ woo vannɩna Nyelyenu kpokpo.
Migɩkaa ɩnʋ ‘pany lɛ xɔ yaa toon
Duu Naarɩ 6.5, 11-12
A Nyelye nɩ nyʋbɔ nʋ fa burkori fɛw, mɔɔnʋ bɔ xɛw gɩkaa. A gɩkaxɔ gbal, xɔ gballɔ lɛɛ satɩ lɛɛ dar. Gɩrɔrɩ gɩrɔrɩ fɛw, nyʋn xɛ gbɔɔ gɩkaa lɛɛ xɛyɛ.
11 Xɔɔ sɩxɔrɩ nyʋbɔ nʋ ɩsɩ burko, bɔ gɩka bɔ tɩɩnɩ gɩpʋtawaka. Wʋlaykɛ kanr hɩnxɔ fɛw. 12 Mɔɔnʋ Nyelye xɛ dow burko xɔɔ sɩxɔrɩ xɔ nɩ mɔɔnʋ xɔ kanr gʋŋmɔpʋ xɔ pʋta.
Nyʋpananga gɔnɩkɛ bɔnʋ dar toon bɔɔ killi a mixo. Bɔ kay mɔ bɔ xaanwrɩ Nyelye a Sɛɛra.
Bɔ vɩr bɔ kay bɔɔti dɩkɛ lɔxɔ nʋ Nyelye xɛ sɛɛrbɔ. Lɔxɔ nʋ ɩsɩ xɔa nanpɩ Nyelye a hɩmanga wa xɔɔ lɔ ɩsɩ bɔɔ xɛbiiye. Bɔ ɩsɩ bɔnʋ kper miw bɔɔ wɔwrɩ lɛ bɔ nyaasɩ wɛɛbɔ. Sɩnwrɩ fɛw mɔɔ lɔ bɔ ɩsɩ bɔ xɛnʋ wʋla. Bɔ ɩsɩ bɔ ŋmɔpɩ gʋnnʋ, bɔ xɛnʋ kʋtɩ bɔɔ wɔw. Bɔ xɛnʋ bɩnnɩ lɛ bɔ fʋlakɛ bɔɔ wɔw. Sɩnwrɩ fɛw mɔɔ lɔ bɔ xɛnʋ ɩndɛ bɔɔ wɔw.
Nyʋn nyʋn fɛw xɛ killise, xɔgumɔ bɔ kunbi killi a miye, bɩ leynu Nyelye.
Bɔ maa buunkesi bɔɔ bɩnnɩkɔɔ, bɔɔ ŋmansakɔɔ, bɔɔ yukoo lɛ bɔɔ nyʋkʋʋxɔ nyʋbɔrɩ, lɛɛ xɔɔ gɩxɛlɛmʋʋ hɩn a tanɩ a ɩsɩ xɔ buunnusi Nyelye yi. Nyelye nɩ bɔɔ killii fɛw.
Ɩ tʋndɛ lɛ giloza Nyelye xɛ nɩ gɩyɛ gɩyɛ fɛw a xɔɔ lɔ xɛ kparyaysise dʋkɔtɩ.
Nyelye pɩr lɛ pʋta hɩnxɔ
Duu Naarɩ 6.6,7
A xɔxɔ gɩrnʋ Nyelye, xɔ la: hɩnaa lɔ baanɩrɩ nyʋbɔ nʋ hɩna sankɛ burkori. 7 Xɔ la lɛɛ: naakʋ mɩy ‘parabɔ mi burtɩtɛɛxɔrɩ fɛw lɛ nangbalawɔ lɛ nanzɩgɩtʋ nʋ fa burkori lɛ linferwo nyelyeri, mɩy ‘parakɔ fɛw lɛ powsi. Mɩɩ lɔ baanɩkɔrɩ fɛw.
Nyʋbɔ yi bɔ gɩka miye bɔ pal bɔ kasa, a Tɔsɛ kpʋl a pɩr lɛ tunkebo, lɛ tunkenu gɩxɛlɛmʋ nʋ a sankɛ burkoori fɛw bɔɔ kooti. Nyelye kpeny xɔ kolle Adan lɛ Ɛva xɔ la: ɛɛ xɛ ɩa kan mɩ tennike wa, ɩy pɩtɩ. Ɩy woo vannɩna lɛ mɩɩ. Bɔ kay Nyelye a tennike a kanga, a bɔ pɩtɩ gʋnnʋ mɔ Nyelye zaa.
Bɔlɔ Nowe a sɩyɛrɩ, Nyelye kolle nyʋbɔ xɔ la: ɛɛ xɛ ɩa kanɔ mɩ tennike wa, mɩy pʋta burkoo. Ɩ gbɔɔza Nyelyey xɛ lɔxɔ nʋ xɔ ka mɔɔ bɔlɔ ya? Gʋnnʋ lɔ, Nyelye xɛ xɛ lɔxɔ nʋ xɔ ka kpokpo.
Nyelye karanpɩ Nowe mɔ xɔ kɛrɛ
Duu Naarɩ 6.8-9
Xɔɔ sɩxɔrɩ, Nowe a gʋʋn lɔ dʋʋnnʋ Nyelye xɔaba. 9 A Nowe fa a nanpɩ ba nyʋbɔ sʋndɛkɛ. A marrɩ Nyelye kɛyakarɩ.
Nyelye a kori lo xɔ tɩɩti a wɛ nyʋn tanɩ ɩsɩ ti a xɔ gi ba nyaaraka xɔ kayhʋn ba tunkee.
Bɔ kun Nowe killi a miye, Satan a dɔɔyaka a miye, mʋ Adan a hoopoo fɛw. Xɔa xɛmʋza suko lo bɛnnɩnʋ Nowe yi. A bɛnnɩ a woo paankɛɛ mʋ ba wɛɛbɔɔ dʋkɔtɩ.
Lɛɛ Nowe tʋrarɩ Nyelye mʋ Abɛlhʋn, mʋ Sɛtɩɩ, mʋ Enɔkɩɩ, gaa gi mɔ bɔɔ tʋrakɛrɩ nantɔbɔnʋ mɔɔ lɔ a tʋrakɛrɩ nantɔbɔnʋ. Nowe kan Nyelye a tennike. A dɛ baanɩkɛ, a xaanrɩ Nyelye, a tɩɩ bʋlaxɔ nʋ Nyelye tɛnnɩ xɔati a zʋ a tʋrakɛrɩ.
Nowe xaan a giloza Nyelye a Suwse nʋ xɔ la: xɔnaay sʋnnʋ, ay suwhɩnaa. Xɔ guri Nyelye a zawgiixo a xɔ ‘yɛɛyɛɛ, xɔ dɛ ba gʋʋn. Xɔ kanbɛy mɔ ɩ bɛnnɩ ɩ kan lɛ gi zawgiye a naa.
Zawgiye lɛ Nyelye a kɛyaka lo xɔ tɩɩti Nowe woo suko. Xɔa bɛnnɩ a woo suko yi. Xɔa xɛmʋza wɛ gɩyɛ lɔ a xɛ a Nyelye lo dankɛɛrɩ yi. Nyelye a kɛyakɔ lɔ kput.
Nyelye ha Nowe ‘pɔrɛbɔ
A mʋ nyʋbɔ ŋmanysɛ lɔ bɔ ɩsɩ bɔ kor fɛw, bɔa nʋ kor bɔnaa gbankɛ bɔnaa gbɔɔyapɔ lɛɛ yiri Nyelye yi, xɔn fa Nyelye ɩsɩnʋ xɔa gbɔɔya nʋ xɛ dɩkɛ burko fɛw xɔa tunkee.
Duu Naarɩ 6.13-21
13 Nyelye kolle Nowe, xɔ la: mɩ koro nyʋbɔ law burkori. Bɔɔ lɔ xɔ tɩɩtɩ a burko kanr wʋlaykɛ naakʋ. Xɔlɔxɛ mi koro sibo fɛw. 14 Xɔ bɛnnɩ wʋ tɛnnɩ dakawgbala lɛ tɩɩ dɩyaxɔ nʋ nʋnʋ fʋnwɔ xɔa isibiye tanɩ, lɛ tɛnɩkɛ satɩ yɔsɩbɔ hɩn-pʋ lɛ fɔl xɔa mixo neekenu lɛ xɔa korike fɛw tɩ. 16 Wʋy dʋnpɩkɛ naw sanr lɛ kpal nʋnaa tanɩ ŋmemiyeri lɛ satɩ kotoro tanɩ xɔa tɩtɛɛxɔ a ŋmemiyeri gbɛrɩ. 17 A mɩɩ, miy xɛ ɔkɔ yi, ɔgbalaka ‘pony lɛ ninke nyʋbɔ lɛ namɔ lɛ gɩxɔ nʋ fa goon burkori fɛw xo ŋmenu lɛ hɩn pɩɩ fɛw. 18 Lɛɛ zɛy gaa nʋ mɔɔ, miy xɛwʋ mɩ dɩɩmɩsɛ. Wʋy yee dakawhʋn lɛ la yɩra lɛ la bɩpɩxɩnabɔ lɛ bɔɔ yɩrabɔ.19 Wʋy tɩɩ namɔ nʋ fa burkori fɛw tawɔrɩ tawɔrɩ, saan lɛ hɩnna, saan lɛ hɩnna lɛ hɩn yee wunu lɛ i woo hɩn tagon. 20 Miy xɛ namɔ fɛw hin-yi la baka. Wʋranamɔ lɛ haynamɔ lɛ nanzɩɩtʋ lɛ linferwo, saan lɛ hɩnna, saan lɛ hɩnna hin-yi la baka. Xɔlɔmʋ hɩn ay tunke wa. 21 Xɔ bɛnnɩ wʋ sasɩ dɩɩlɔ isibiwri tawɔrɩ tawɔrɩ, gaan lɛ la nyʋbɔ lɛ namɔ fɛw, i-woo xɔɔ dɩɩlɔ lɛɛ dɩ.
Nyelye kolle Nowe xɔ la: xɔnaay zɛy ɔgballaka yi lɛ saamɩ burkoo fɛw. Nyelye kollee xɔ la: a tɛnnɩ gbowgballaka, lɛ xɔɔlɔmʋ lɔbɔ nʋ xaanrɩ Nyelye bɔ maa woo suko mɔ bɔ fɛw.
Nowe bɛnnɩ a tɛnnɩ xɔɔ gbokoo mɔ Nyelye kaan. Nowe bɛnnɩ a dʋw Nyelye a ‘pɔrɛbɔ. Gbokoo bɛnnɩ xɔ tɛnnɩ Nyelye a fɩllɩnʋ. Nyelye karanpɩ Nowe mɔ a bɛnnɩ a tɛnnɩ xɔɔ gbowgballakɔ. Nowe aa ɩsɩnʋ maa lɛ tɛnnɩ ba gboko mɔ a kor yi.
‘Pɔrɛbɔ nʋ Nyelye ha Nowe gboko a tɛnnɩkɔrɩ, wɛ gʋʋn tanɩ ti hɩn kanbɛy mɩ kor ɩ sayɔ ɩ taarɩ. Gbokoo ba nʋnayeewaa tanɩ lɔ a bɛnnɩ a ɩsɩ. Nyʋn nyʋn fɛw xɔ kay nama nama fɛw nʋ maa a yee gboko a xɔɔ nʋnaahʋnrɩ, hʋʋn bal Nyelye a kparyaysinaa. Gboko tanɩ tenten lo ɩsɩ fa nʋ nyʋbɔ maa woonu suko Nyelye a hʋnwɔrɩ, a dʋkɔtɩ nʋnaa tanɩ lɔ ɩsɩ ti nʋ bɔ maa dʋʋrɩ lɛɛ yee xɔɔ gbokoo a mixo.
Nowe kan Nyelye a tennike
Duu Naarɩ 6.22
A Nowe xɛ xɔɔ gʋnbɔ gʋnnʋ mɔɔnʋ Nyelye karanpɩyɔhʋn fɛw.
Nowe sa ba xaan Nyelyeri. A xaanrɩ Nyelye, xɔɔ lɔ anʋ xaanti a giloza xɔɔ lɔy suwhɩnaa lɛ ban wʋrasɛbɔ ɔgballakɔ nʋ Nyelye la: xɔnaay sʋnnʋ xɔa sɩyɛrɩ. Nowe kan Nyelye a tennike, a tɛnnɩ gbokoo mɔ Nyelye la: a tɛnnɩkɛ.
Lɔxɔ nʋ Nyelye a Sɛɛra sɛɛr fɛw xɛ kparyay. Halɛ mɔ Nowe a kpeny a gisi gɩxɔ nʋ bɔ xɛ ka ɔyiiwaka yi, a kay a xaanrɩ Nyelye.
Nowe karanpɩ nyʋbɔ hɩnxɔ fɛw Nyelye a sɛɛraa gaa gi mɔ mɩɩ karanpʋwɛɛ ɩ mɔɔ. Nowe kollebo a la: Nyelye a kor bɔɔ xɛbiŋmɔpɩxɔ nʋʋ wa, lɛɛ Nyelyey sʋnnʋ ɔgballaka lɛ tunkenu burkoo lɛ gɩxɔ nʋ burkoori fɛw. A kollebo a la: bɔɔ gbankɛ bɔɔ gbɔɔyabɔ, bɔ xaanrɩ Nyelye, bɔ yee gboko nʋ Nyelye la: hɩnaa tɛnnɩ xɔa miye, bɔy woo suko.
Nyʋbɔɔ a ɩnʋ kor bɔnaa tʋndɛnʋ Nyelye a Sɛɛra yi, lɛɛ Tonreduwa ɩnʋ xɛbɔrɩ gʋʋn fɛw mɔ bɔa maa paanɩ yi. Sɩnxɔ nʋ ɩ xɛ gbɔɔ lɔxɔ nʋ mɩ tʋndɔkɔ-ɩ, ɩ tʋndɛ lɛ giloza Tonreduwa lɔ xɛ xɛ-ɩ lɛ ɩ gbɔɔ lɛ maa xaanrɩ Nyelye a Sɛɛra.
Nowe a sɩyɛ a nyʋbɔ a nʋ kor bɔnaa kanʋ gʋʋn nʋ Nyelye sʋnnʋ Nowe yi. Xɔ ɩsɩ xɔ dʋʋnbɔnʋ sɩnxɔ nʋ bɔ ɩsɩ bɔɔ xɔɔ xɛbiŋmɔpɩxɔ a mixo, bɔa nʋ kor bɔnaa dɛ baanɩkɛ yi.
Nyelye kolle Nowe xɔ la: a yeke ba wʋrasɛbɔ lɛ namɔ lɛ limu gboko a mixo
Duu Naarɩ 7.1-4
A Nyelye kolle Nowe, xɔ la: wu-yee dakaw lɛ la wʋrasɛbɔ. Mɩ nɩ mɔɔnʋ wʋ kɛrɛ laba la nyʋbɔ sʋndɛkɔ. 2 Wʋ-tɩɩ namɔ nʋ kɛrɛ isibiwri fɛw hɩn a saan lɛ hɩnna, saan lɛ hɩnna naw tɔnyor nuy xɛ namɔ ‘pɔrwɔ lɛ na isibiwri fɛw lɛ vɩr tɩɩ namɔ nʋ a maa xoo wa, saan lɛ hɩnna naa tanɩ, hɩn a isibiwri fɛw nyor nyor. 3 Lɛɛ vɩr tɩɩ linferwo, saan lɛ hɩnna, saan lɛ hɩnna, isibiwri fɛw hɩn a naw tɔnyor tɩ lɛ hɩn ay tunke burkori yi. 4 Xɔ zɛy gɩrɔ tɔnyoor lɛ mɩɩlɔ xɛ ɔkɔ yi hɩnxɔ fɛw, gɩrɔ townyoor lɛ hɩn a dʋmɔ fɛw. Mɩy ‘para gɩgonxo nu mɩ tɛnnɩ burkori fɛw.
Nyelye bɛrɔ mɔ lɔ hɩnxɔ a nyʋbɔ kannʋkɔ xɔa sɛɛra, lɛ dɛ lɔxɔ nʋ xɔ xɛ ka, lɛ xaanhɩnaarɩ. Lɛɛ wɛ gɩraarɩ xɔy za: xɔ kɛrɛ mɔɔ. Mɩa maa bɛr dan yi. Lɔbɔ nʋ kayɔ mɔ bɔ xaanwrɩ Nyelye bɔy yaa datusiyeri mɔ bɔ fɛw.
Mɔ gbokoo law, Nyelye kolle Nowe xɔ la: a yeke ba nyʋbɔ fɛw lɛ namɔ nʋ xɔ si gboko a mixo xɔ law ɔkɔɔ lɔ gow xɔnʋ yi. Nowe dankɛna a giloza Nyelyey tunkebo burkoo fɛw. A dankɛna a giloza hɩnaa lɛ hɩnaa nyʋbɔ Nyelye lo maa suwbonaa. Dʋkɔtɩ a xɛ lɔxɔ Nyelye ka.
Nyelye bantɩ gboko a nʋnaahʋn
Duu Naarɩ 7.5-16
A Nowe yaa, a xɛ gʋnbɔ nʋ Nyelye karanpɩɩ fɛw.
6 A sɩnxɔ nʋ Nowe a dɩw dan bomisanr, xɔɔ sɩxɔrɩ lɔ ɔgbalakɔ yiti burkori. 7 A Nowe lɛ ba yɩra lɛ ba bɩpɩxɩnabɔ lɛ bɔɔ yɩrabɔ, bo yee dakaw a mixo, bo woo bo leynu ɔgbalakɔ. 8-9 A namɔ nʋ kɛrɛ lɛ lɔbɔ nʋ bɔa xɛ xoo wa lɛ linferwo lɛ nanzɩgɩtʋ, hin yi hɩn dan Nowe a dakaw a baka, saan lɛ hɩnna, saan lɛ hɩnna nyor nyor fɛw, mɔɔnʋ Nyelye sɛɛryɛ.
10 A tɔnyorke gɩraxɔ, ɔgbalakɔ yiti gʋnnʋ deny. 11 Xɔɔ dɩxɔ nʋ Nowe a dɩw dantɩ bomisanr deny, xɔa nyorke fɩnxɔrɩ, xɔa ‘pɔrwɔ lɛ tɔnyorke gɩraxɔrɩ, tɛwɔ nʋ fa burko a mixo natɩrɔ hɩn kpala hin gu ɔkɔ kalɔrɩ kalɔrɩ fɛw lɛ nyelxo a tɛwɔ kpala ɩnʋ pow ɔkɔ bakɔ fɛw tɩ. 12 Xɔɔ ɔkɔ nʋ yi mʋ, xɔ dan gɩrɔ townyor lɛ hɩn a dʋmɔ fɛw.
13 A Nowe yee dakaw xɔɔ gɩraxɔ nʋ bɔ ka, a yee lɛ ba yɩra lɛ ba bɩpɩxɩnabɔ Sɛm lɛ Kam lɛ Yafɛtɩ lɛ bɔɔ yɩrabɔ tɩ. 14 A haynamɔ lɛ wʋranamɔ lɛ nanzɩɩtʋ lɛ linferwo lɛ gɩxɛlɛmʋ zɩɩtʋ, hin yee dakawhʋn fɛw. 15 A gɩyɛ gɩyɛ fɛw nʋ ŋmenu burkori, saan lɛ hɩnna nyor nyor, hin yiri Nowe dakaw a baka. 16 Hin yee sanw lɛ hɩnnɔ, mɔɔnʋ Nyelye kpeny xɔ karanpɩ Nowe. Xɔ law a Nyelye lo bantɩ nʋnaa Nowe a korikeri.
Mɔ bɔ yee gboko a mixo bɔ law fɛw Nyelye bantɩ xɔa nʋnaahʋn.
Sɩnxɔ nʋ Nyelye bantɩ gboko a nʋnaahʋn, xɔ ‘pɩnnɩ sɩnyɛ xɔ law. Nyelye aa kor hɩnaa ha sɩnyɛ nyʋbɔ lɛ bɔ gbankɛnʋ bɔɔ gbɔɔyabɔ lɛ xaan danwa.
Nyʋbɔ nʋ ɩsɩ osuko bɔllɛ, bɔ fʋla Nyelye lɛɛ bɔa maa yee xɔɔ gbowgballakɔ a mixo yi. Bɔa ɩsɩnʋ gɩxɔ nʋ maa dankɛbɔɔrɩ lɛ bɔɔ woo suko yi. Lɔbɔ nʋ ɩsɩ gboko a mixo woo bɔɔ tagon, xɔgumɔ Nyelye lo bantɩbɔ xɔ sa mi.
Sɩnxɔ nʋ Nyelye nɩnnɩ Adan lɛ Ɛva daansʋkpɛɛxɔ a mixo, xɔ lɔ yaa xɔ sabɔ kpay lɛ tagodɩyaxɔ, bɔ ɩsɩnʋ maa lɛ vɩr gbulenke fi ya? Kpey, bɔa ɩsɩnʋ maa yi.
Sɩnxɔ nʋ Nyelyey vɩr pɩr lɛ paankɛ hɩnxɔ, wɛ gɩyɛ aa ti xɔy maa dankɛbɩrɩ lɛ bɩ ley yi.
Lɔbɔ nʋ a ɩsɩ gboko a mixo wa, Nyelye tunkebo fɛw
Duu Naarɩ 7.17, 21-23
A gʋnnʋ ɔkɔ yi gɩrɔ townyorhun. Xɔ kanrkɛ burko, xɔ bɩr dakaw, xɔ ɔrkɛɛ ɔtaalakarɩ. A dakaw ɩnʋ taatɩ langa langa langa.
21 A gɩxɛlɛmʋ nʋ fa goon burkori, limu lɛ wʋranamɔ lɛ haynamɔ lɛ nanzɩɩtʋ lɛ nyʋbɔ, hɩn pɩɩ fɛw. 22 Gɩyɛ gɩyɛ nʋ nʋnʋ ŋmeni burkori xɔ pɩɩ fɛw. 23 Gʋnnʋ lɔ Nyelye ‘para gɩgonxo nʋ fa burkori fɛw, nyʋbɔ yooo lɛ nangbalɔ lɛ nanzɩgɩtʋ lɛ linferwo yooo, hin tunke burkori fɛw. Xɔlɔ zɛy Nowe lɛ lɔbɔ nʋ a nʋnʋ dakaw a mixo bɔɔba.
Ɔkɔɔ pʋ xɔ kasa, xɔ yaa xɔ mʋrankɛ gbɔwwɔ nʋ sʋsʋla. Ɩ tʋndɛnʋ mɔɔnʋ burkoo ɩsɩ sɩnxɔ nʋ Nyelye ɩnʋ sankɛyɛ ya? Xɔ ɩsɩ wurinbike a miye, ɔkɔ lɔ ɩsɩ xɔ suw bakɔɔ fɛw. Nyorke gɩraxɔrɩ, Nyelye sankɛ nyelbirixo nu bɩ xɛ dow mɔɔ lɛ bääni nu burkoo lɛ xɔɔ nyelbirixo hɩn a sʋndɛkɔɔ, xɔ lɔ tɩɩ ɔkɔ nʋ ɩsɩ burkoo xɔa wɛ boko xɔ sa nyeltaaxɔrɩ fi ‘lekeri. Sɩnxɔ nʋ ɔgballakɔ nʋ dɩw nyʋbɔɔ bɛnnɩ xɔ yi, lɔxɔ nʋ Nyelye sa fi ‘lekoori, xɔɔ lɔ xɔ dʋsɩ a xɔ yi.
Nyelye xɛ ɔkɔ yi gɩrɔ townyor lɛ xɔa dʋnmɔ townyor, xɔ yaa xɔ dannʋ sɩnxɔ nʋ ɔkɔ mʋrankɛ burkoo lɛ gbɔwgballɔ fɛw.
Lɔbɔ nʋ aa ɩsɩ gboko a mixo wa, Nyelye tunkebo fɛw. Nowe lɛ ba wʋrasɛbɔ bɔɔba, bɔɔ lɔ xaanrɩ Nyelye bɔ yee gboko a mixo. Nyʋbɔ nʋ zɛy fɛw bɔ kay xaan. Nyʋpananga xɛ kay mɔ bɔ xaanwrɩ Nyelye lɛɛ nʋ xaanrɩ Satan. Nyʋpananga ti xɔ xɛ dʋʋnbɔnʋ mɔ bɔ mi bɔɔ killi a miye, bɔa xɛ kor bɔnaa dɛnʋ Nyelye wɔɔrɩ mɔ bɔnaa dʋsɩ bʋlaa yi.
Nyelye tʋndɛnʋ Nowe lɛ lɔbɔ nʋ ɩsɩ gboko a mixo fɛw
Duu Naarɩ 8.1-4, 14-19
A Nyelye tʋndɛnʋ Nowe lɛ namɔɔ, haynamɔ lɛ wʋranamɔ nʋ mi dakaw. Xɔ xɛ, a geke haw burkori lɛ ɔkɔ maa ŋmele. 2 Ɔkɔ a tɛwɔ nʋ kpala burkori lɛ lɔbɔ nʋ kpala nyeltaaxɔrɩ hɩn bantɩ fɛw, ɔkɔ a maa yi danwa. 3 Mɔɔnʋ ɔkɔ yi xɔ yaa xɔ dannʋ gɩrɔ towtɔnyor lɛ ‘pɔrwɔ (150), xɔlɔ ɔkɔ tɩɩtɩ xɔnʋ ŋmele lɛ wɛr. 4 A xɔa tɔnyorke fɩnxɔrɩ, xɔa gɩrɔ ‘pɔrwɔ lɛ tɔnyor, xɔlɔ dakaw wɛrtɩ, a yaa a dɛɛ Aratɩgbɔwɔ a wɛ gbɔkɔrɩ.
14 A xɔ yaa, xɔ dan xɔɔ dɩxɔ a nyorke fɩnxɔrɩ, xɔa gɩrɔ toko lɛ tɔnyorke gɩraxɔrɩ. Xɔɔ sɩxɔrɩ burko xɔny kɛyakarɩ. 15 Xɔɔ sɩxɔrɩ lɔ Nyelye kolle Nowe, xɔ la: 16-17 ɩ-san dakaw a mixo naakʋ, gaa lɛ la yɩra lɛ la bɩpɔ lɛ bɔɔ yɩrabɔ lɛ sankɛnʋ namɔ nʋ mi isibiwri fɛw, linferwo lɛ nangbalawɔ lɛ nanzɩgɩtʋ, hɩn-san lɛ kun ‘pony lɛ ‘pany lɛ kanr burko. 18 A gʋnnʋ Nowe san lɛ ba nyʋbɔ fɛw. 19 Mɔɔnʋ bɔ san bɔ law, namɔ tawɔrɩ tawɔrɩ fɛw san tɩ.
Nyelye ɩnʋ bɛr Nowe lɛ ba nyʋbɔ lɛ namɔ nʋ ɩsɩ gboko a mixo. Bɔɔ tanɩ aa pɩɩ yi. Nyelye ɩnʋ tʋndɛbɔnʋ, xɔ inke ɔkɔɔ. Xɔ zɛy gewgballaka yi xɔ xwɛɛnlɛkɛ ɔkɔɔ. Burxɔnywaka vɩr xɔ yi. Nyelye gbul ɔyiiwaka lɛ geke xɔa nuuwo. Nyelye aa xɛ gbankɛ yi. Xɔa xɛ paanɩ yi.
Nyelye dɛ Nowe a sʋlaykɛ
Duu Naarɩ 8.20-21
A Nowe law a gboole Nyelye a sʋlanaa. A tɩɩ namɔ nʋ kɛrɛ lɛ limu nu kɛrɛ tɩ, a tɩɩyɔ isibiwri tantantan fɛw, a sʋla a nyoko a ha Nyelye. 21 A Nyelye kan gɩxɛlɛmʋ nʋ bɔ sʋla bo nyoko, hɩn a ŋmɩnyxɔ, xɔ dʋʋnyɛnʋ, xɔlɔxɛ xɔ gbɔɔ xɔa miye, xɔ la: maay vɩr pʋta burko we surwo nyʋbɔ kooti danwa. Gʋnnʋ lɔ, nyʋn a gbɔɔya nʋ bo kumenu a gɩka kpokpo lɛɛ maay vɩr pʋta gɩgon gɩgon fɛw mɔɔnʋ mɩ xɛyɛ naakʋ wa.
Mɔɔnʋ Nyelye dɛ Abɛl a sʋlaykɛ, mɔɔ hʋn lɔ xɔ dɛ Nowe angɔ. Nyelye dɛ Nowe lɛ ba wʋrasɛbɔ gʋʋn mɔ bɔ tɩɩ bʋlaxɔ nʋ xɔ tɛnnɩ xɔati bɔ zʋ bɔ tʋrakɛrɩ: Bɔ xaan bɔ giloza Nyelyey dɛ bɔɔ gʋʋn nantɔbɔbɔ lɔ xɔ tɩɩti. Nantɔbɔbɔ aa fɔɔr bɔɔ killi a pɛngɛ yi, lɛɛ xɔxɔ tʋndɛkɛbɔ mɔ killi xɛ yinu pɩɩrɛkɛ. Nyelye dɛ bɔɔ gʋʋn xɔa zawgiye lo xɔ tɩɩti.
Nyelye ha xɔa ‘pɔrɛbɔ Nowe, xɔ haannʋ nʋfɩsaawɔ dʋkɔtɩ
Duu Naarɩ 9.1-3, 7
A Nyelye ha Nowe xɔa kɛyaka lɛ ba bɩpɩxɩnabɔ, xo kollebo, xɔ la: i-kun lɛ pʋ ‘pony lɛ kanrkɛ burko. 2 Miy xɛ namɔ namɔ nʋ fa burkori fɛw lɛ linferwo nyelyeri lɛ bʋsanbɔ ɔkɔ, hɩn hɔb-ɩ lɛ ɩ-tɔyɔ. 3 Gɩgonxo nu fa burkori fɛw xɔ taatʋ xɔ xɛ nama, mɩ hayɔ-ɩ, hɩn xɛ ɩ dɩɩlɔ, mɔɔnʋ mɩ kpeny mɩ ha-ɩ gɩxɛlɛmʋfuwo hɩn xɛ ɩ dɩɩlɔ duu tɩ.
7 Lɛ ɛɛn tɩ, inu-kun bɩpɔ lɛ ‘pany lɛ pʋ lɛ zawsɩ burkori fɛw.
Nyelye xɛ Nowe lɛ ba bɩpɔ nʋ xɛ Sɛm lɛ Kam lɛ Yafɛtɩ tɔsɛbɔ. Xɔ la: bɔɔ lɔ tɔ namɔ, limu lɛ bʋsanbɔ gaa gi mɔ xɔ kpeny xɔ xɛyɛrɩ Adan duu xɔa gownaa. Hɩnxɔ lɛ gɩxɔ nʋ burkoori fɛw xɛ Nyelye angɔ, lɛɛ xɔ xɛ hayɛ nyʋn nʋ xɔ kor mɔ a maanʋ doke.
Nyelye lal xɔa sɔkparaka (nyelban/sʋlsan) mʋ gɩkaranpɩwakaa
A Nyelye vɩr xo kolle Nowe lɛ ba bɩpɔ, xɔ la:
Duu Naarɩ 9.11-17
Gʋnnʋ gʋnnʋ mɩ xɛw-ɩ mɩ dɩɩmɩsɛbɔ, xɔlɔxɛ ɔgbalaka ay vɩr tunke gɩgonxo nʋ fa burkori danwa, xɔay vɩr yi lɛ pʋta burko tɩ wa. … miy ha-ɩ gɩxɔ nʋy karanpɩ-ɩ mɔɔnʋ mɩ xɛ ɩnʋ dɩɩmɩkɛ. 13 Miy tɩɩ mɩ sɔkparaka lɛ xanɩ nyelnaarɩ lɛ xɔ tʋndɛkɛ-ɩ mɔɔnʋ mɩ xɛnʋ burko dɩɩmɩkɛ. 14 Sɩnxɔ nʋ mɩy taalɛkɛ gʋntʋbɔ nyeltaaxɔrɩ lɛ sʋlsan lɔ san lɛ xanɩkɛ, 15 miy tʋndɛnʋ mɩ dɩɩmɩkɔ nʋ mɩ dɩɩmɩ-ɩnʋ lɛ namɔɔ fɛw burkori, xɔlɔxɛ ɔgbalaka ay vɩr yi lɛ tunke gɩgonxo danwa. 16 Mɩɩ nɩ sʋlsan nyelnaaxɔrɩ, mɩy tʋndɛnʋ dɩɩmɩkɔ nʋ mɩ dɩɩmɩ-ɩnʋ lɛ namɔ fɛw burkori kpokpokpo law kay. 17 A xɔ vɩr xo kolle Nowe, xɔ la: sɔkparakɔ lɔy karanpɩ-ɩ lɛ gɩgonxo nu fa burkori mɔɔ mɩ xɛ-ɩnʋ dɩɩmɩkɛ.
Nyelye lal xɔa sɔkparaka mʋ gɩxɔ nʋ karanpʋ mɔ xɔay vɩr pʋta burkoo ɔkɔnʋ dan yi. Sɩnxɔ nʋ xɔɔ ɔgballakɔɔ yi lɛ damɔ daa, dɩw nʋ ‘pɩnnɩ pʋ hɩn lɛɛ Nyelye a gbankɛ xɔa sɛɛra yi.
Sɩnxɔ nʋ ɩy nɩ Nyelye a sɔkparaka nyeltaarɩ, ɩ tʋndɛ lɛ giloza Nyelye lalyɛ lɛ karanpɩ-ɩnʋ mɔ xɔay vɩr pʋta burkoo tɩ dan yi. Nyelye xɛ nyʋn nʋ bɩ bɛnnɩ bɩ dankɛna ti.
Nyʋsantɔbɔ nʋ xɛ nyʋn nʋ burtɩtɛɛxɔrɩ fɛw bɔɔ sorwo taabɔ
Duu Naarɩ 9.18, 19
18 A Nowe a bɩpɩxɩnabɔ nʋ a ɩsɩnʋ dakaw a mixo bɔlɔ san, bɔɔ wɛɛ lɔ bɔ xɛ bʋlɛ Sɛm, wɛhʋn lɔ Kam, wɛhʋn lɔ Yafɛtɩ. A Kam, hʋn lɔy xɛ Kanan ta sʋwa. 19 Xɔɔ bɩpɩxɩnabɔ sanrhʋn lɔ vɩr bɔ xɛ nyʋbɔ nʋ kanrkɛ burkoo.
Nyʋbɔ nʋ burkoori fɛw, nyʋsantɔbɔ nʋʋ lɔ bɔ guti. Xɔɔ nyʋsantɔbɔɔ, bɔɔ tanɩ xɛ ɩ sorwo.
